Нийслэлийн хэмжээнд газар олгосон түүхийг ил болголоо

Нийтийн мэдээллийн ил тод байдлын тухай хуульд заасан 68 төрлийн мэдээллийг олон нийтэд ил тод болгох үүргийг хариуцсан албан тушаалтнуудад олгосон байдаг. Засгийн газраас  хуулийн хэрэгжилтийг хангаж, Шилэн ажиллагааны хүрээнд “Shilen.gov.mn” сайт дээр төрийн зарим мэдээллийн олон нийтэд ил тод болгож байгаа.

ЦХХХ-ийн сайд Н.Учрал энэ тухайд “Газар зохион байгуулалт, ерөнхий төлөвлөлтийн мэдээллийг өнөөдөр shilen.gov.mn дээр нээлттэй болгож байна. Бид улсынхаа газар нутгийн 0,3 хувьд дээд зэргийн зохион байгуулалтгүй хүн амынхаа 50 хувь нь төвлөрөн амьдарч байна. Ийм хот дэлхий дээр бараг үлдсэнгүй. Тиймээс хотын газар олголтын мэдээллийг ил болгохыг олон нийтийн зүгээс өнгөрсөн хугацаанд иргэд шаардсаар ирсэн юм. Улаанбаатар хотын газар олголтын түүх бол цементэн ширэнгэ, агаар, ус, хөрсний бохирдлын түүх боллоо.  

Газар олголтын мэдээллийг ил тод болгохыг улстөрийн өнцгөөр харж болохгүй. Ил тод мэдээлэлд аль нэг нам, улстөрийн өнцгөөр ялгаварлах аргагүй юм. МАН-ын гишүүн хотын дарга нарын гарын үсэг хамгийн олон байгаа. Ил тод мэдээлэлд хэрхэн яаж хандах нь иргэн таны эрх үүрэг.  Хэн, хэнд хэрхэн яаж газар олгосон тухай 20 жилийн мэдээллийг олон нийтэд ил болгож байгаа юм.

Мэдээлэл хариуцагч нийслэлийн газрын албаны ирүүлсэн мэдээллийг нэрээр нь, он цагаар нь, байршлаар нь зориулалтаар нь олгосон Засаг дарга, олгуулсан компанитай нь, цаашид  хэдэн удаа дамжиж шилжсэн баримтаар нь ил болгож байна.

Нийслэлийн Засаг дарга нарын 2000-2022 оныг хүртэлх газар олголтын баримт ил болж байгаа бөгөөд үүнд, газар эзэмших, ашиглах эрх олгосон 14954, эрхийн гэрчилгээний талбай зориулалт өөрчилсөн 6429, эрхийн гэрчилгээ шилжүүлсэн 8525, эрхийн гэрчилгээний хугацаа сунгасан 7150 гээд нийт 36958 захирамжийг нээлттэйгээр байршуулсан” гэлээ.