Шуурхай: Цаг агаарын аюулт үзэгчдээс сэрэмжлүүлж байна

ЦУОШГ-аас цаг агаарын аюулт үзэгчдээс сэрэмжлүүлж байна. Тавдугаар сарын 19-ний өдөр Хэнтийн нутгаар хүчтэй цасан шуурга шуурах талаар мэдээлж, “Харанга” хэмээн тодотгожээ.

Мөн өнөө шөнө Өмнөговь, Дундговь, Дорноговийн нутаг, Хэнтийн өмнөд хэсгээр салхи секундэд 18-20 метр, зарим үед секундэд 24 метр хүрч ширүүсэж, шороон шуурга шуурч, Хэнтийн баруун хэсгээр цасан шуурга шуурна. Маргааш өдөр Өмнөговь, Дундговийн зүүн хэсэг, Дорноговь, Хэнтий, Дорнод, Сүхбаатарын нутгаар салхи секундэд 18-20 метр, зарим үед секундэд 24 метр хүрч ширүүсэж, Сүхбаатарын хойд хэсгээр цасан шуурга шуурах юм байна. 

ЦУОШГ-аас уг мэдээллийг сэрэмжлүүлэхдээ “2008 оны тавдугаар сарын 24-25-нд их халуун болсон. 26-ны өглөөгүүр жаахан бороо хаялж байгаад шуурч, удалгүй цасан шуурга болж, агаарын температур эрс буурснаас олон хүн, хүүхэд осгож нас барсан. 

Шуурга эхлэх үед дан цамцтай, мотоциклтэй явсан хүмүүс хөлдөж бурхан болсон байсан. Хэнтийн цаг уурын газрынхан аймгийн ОБГ-тайгаа хамтарч сайн ажилласан боловч малчид бэлтгэлгүй байсан” хэмээн адилтган дурджээ.