ШУТИС: БАГШ, ОЮУТАН ХОЁР ОЙЛГОЛЦОЖ, БИЕ БИЕЭСЭЭ УУЧЛАЛТ ГУЙСАН

ШУТИС-ийн оюутан хичээлээсээ хоцорч ирээд зөвшөөрөл авахгүй танхимд орсонд багш нь дургүйцэж, шаардлага тавьжээ. Оюутан багшийн тавьсан шаардлагыг эсэргүүцэж гар утсаараа шууд бичлэг хийсэн нь цахим орчинд түглээ.

Багш, оюутан хоёрын энэ зөрчлийг цахим орчинд шүүж байна. ШУТИС-д оюутны баримтлах ёс зүйн дүрэмтэй эсэх, энэ зөрчилд сургуулиас ямар арга хэмжээ авсан талаар ШУТИС-иас тодруулахад,

Цахим орчинд тарсан бичлэг олны анхаарал татаж байна. Энэ асуудлаар сургуулийн удирдлага багш, оюутныг дуудаж уулзан, зохих арга хэмжээ авч сануулга өгсөн. Багш, оюутан хоёр ойлголцож, бие биеэсээ уучлалт гуйсан.

ШУТИС багшаа ч, оюутнаа ч хамгаална. Оюутан хичээлээс хоцорсон нь сургуулийн дотоод журам зөрчсөн үйлдэл мөн. Багш нар  манай сургуулийн брэнд байдаг. Тухайн багш ШУТИС-д олон жил ажиллаж буй туршлагатай, сайн багш нарын нэг.  

Оюутан ч ШУТИС-ийн салбар сургуульд сайн мэргэжлээр сурч байгаа. Багш, оюутан хоёр ойлголцсон учир оюутан хичээлдээ явж, сургалтын үйл ажиллагаа хэвийн үргэлжилж байна гэв.